पूर्वेली प्रेस
विराटनगर : नेपाली कांग्रेसका नेता एवं पूर्वमन्त्री डा. मिनेन्द्र रिजालले गठबन्धनमा भोट हाल्न पाउँदा आफू खुसी भएको बताएका छन् ।
शुक्रबार साँझ मोरङ क्षेत्र नम्बर-४ को ग्रामथानमा गठबन्धनको घरदैलो कार्यक्रममा बोल्दै रिजालले आफू गठबन्भनमा भोट हाल्न तयार रहेको बताए ।
उनले सो क्षेत्रबाट प्रतिनिधिसभा सदस्यको उम्मेदवार रहेका माओवादीका अमनलाल मोदी र प्रदेश (१) का कांग्रेस उम्मेदवार गुरुराज घिमिरेलाई मत माग्दै उनीहरुको प्रशँसा गरे ।
रिजालले आफू मोरङ-४ को मतदाता भएको बताएका छन् । उनले अघिल्लो निर्वाचनमा आफूले भोट हाल्न नपाएको भन्दै यसपाली गठबन्धनका उम्मेदवारहरुलाई भोट हाल्ने अवसर मिलेको बताए ।
प्रतिनिधिसभाका उम्मेदवार अमनलाल मोदीको तारिफ गर्दै रिजालले भने, ‘संविधान निर्माण गर्ने बेला पनि हामी सँगै बसेर काम गरेका हौँ । हिजो केपी ओलीले संसद विघटन गर्दा पनि हामी मिलेर पुनःस्थापना गर्यौँ । अब संविधान रक्षाका लागि हामीले अमनलाल मोदीलाई विजय गराउनुपर्छ ।’
रिजाल २०७४ को निर्वाचनमा मोरङ क्षेत्र नम्बर-२ बाट विजयी भएका थिए । यो क्षेत्रमा यसपटक गिरिजापुत्री सुजता कोइराला चुनावी मैदानमा छिन् ।
