पूर्वेली प्रेस
विराटनगर : नेकपा एमाले मोरङमा नेता तथा कार्यकर्ताको असन्तृष्टि चर्किँदै गएको छ । टिकट वितरणमा असन्तुष्टि जनाउँदै नेताहरुले धमाधम पार्टीबाट राजिनामा दिइरहेका छन् ।
शनिबार मात्रै एमाले मोरङका सचिव रुपेश खतिवडा, प्रदेश कमिटी सचिवालय सदस्य डिल्लीराम शर्मा, केराबारी गाउँ कमिटी अध्यक्ष देविलाल लिम्बूसहित २० जनाले पदबाट राजिनाम दिएका थिए । आइतबार बिहान एमाले मोरङका जिल्ला कमिटी सचिवालय सदस्य मेघराज कट्टेलले राजिनामा दिएका छन् ।
उम्मेदवारहरुले मनोनयन दर्ता गरिरहँदा एमाले मोरङ पार्टी छाड्नेको संख्या रोकिएको छैन् । आइतबार दिउँसो पाँच नेताहरुले पार्टीबाट अलग भएको घोषणा गरेका छन् । पार्टीबाट राजिनामा दिनेहरुमा एमाले प्रदेश कमिटी सचिवालय सदस्य रामकुमार बस्नेत, प्रदेश सदस्य प्रतापकुमार थापा, मधु गुरुङ, राजकुमार बस्नेत र जिल्ला कमिटी सचिवालय सदस्य गीता सिवा रहेका छन् ।
संयुक्त राजिनामा पत्र जारी गर्दै उनीहरुले पार्टीले आम कार्यकर्ताको भावना र चाहना विपरीत गतिविधि गरेको महशुस गरी पार्टीबाट अलग भएको बताएका छन् ।
आफूहरुजस्तै पार्टीबाट अपमानित भएकाहरुलाई पार्टीबाट अलग हुन र आगामी दिनमा स्वतन्त्र भएर राजनैतिक, सामाजिक अभियानमा सामेल हुनसमेत उनीहरुले आग्रह गरेका छन् ।
