पूर्वेली प्रेस
विराटनगर : नेकपा एमालेले ऐन महरलाई केन्द्रीय सदस्यबाट बर्खास्त गरेको छ । बिहीबार पार्टी कार्यालय च्यासलमा बसेको सचिवालय बैठकले महरसहित दुई जना नेतालाई केन्द्रीय सदस्यबाट हटाएको हो ।
एमालेले सिराज अहमद फारुकीलाई पनि केन्द्रीय सदस्यबाट हटाएको छ । तर, नेकपा एमालेका प्रचार विभाग प्रमुख रोजेन्द्र गौतमले भने उनीहरुले राजीनामा दिएको र केन्द्रीय कमिटीले त्यसलाई स्वीकृत गरेको भनेर विज्ञप्ती जारी गरेका छन् ।
विज्ञप्तीमा भनिएको छ, ‘बैठकले दुई जना केन्द्रीय कमिटीका सदस्यहरु अहमद फारुकी र ऐन महरको राजीनामा स्वीकृत गरेको छ।’
एमालेको उच्च स्रोतका अनुसार उनीहरुलाई बर्खास्त गरिएको हो । बर्खास्त गरिएको निर्णय सार्वजनिक गर्दा विभिन्न कारण खुलाउनुपर्ने भएकाले राजीनामा स्वीकृत गरिएको भनेर विज्ञप्ती जारी गरिएको ती नेताले बताए ।
अनेरास्ववियुका पूर्वअध्यक्षसमेत रहेका महरको यौन विचलनमा परेको अडियो सार्वजनिक भएको थियो भने फारुकी आर्थिक बिचलनमा परेका छन् ।
