पूर्वेली प्रेस
विराटनगर : विराटनगर महानगरपालिकाका १९ वटै वडाबाट राष्ट्रिय परिचयपत्रको विवरण संकलन हुने भएको छ । जिल्ला प्रशासन कार्यालयमा हुने भिड घटाउन वडा तहबाटै विवरण संकलन सुरु गरिएको हो ।
विराटनगरमा बैशाख १५ गतेदेखि परिचयपत्र संकलन सुरु हुने बताइएको छ ।
वडाबाटै परिचयपत्र विवरण सकलन गर्नको लागि महानगरले अभिमुखीकरण कार्यक्रम समेत गरेको छ ।राष्ट्रिय परिचयपत्रको विवरण संकलन गर्न महानगरले आवश्यक जनशक्ति तयार गरि तालिम दिइसकेको छ ।
राष्ट्रिय परिचपत्रमा जनसांख्यिक र जैविक विवरण समावेश हुन्छ । जनसांख्यिक विवरणमा नाम थर, जन्म मिति, लिंग, राष्ट्रियता, स्थायी अस्थायी ठेगाना, बुबा आमा, पति पत्नी, बाजे बज्यैको नाम थर, नागरिकता सम्बन्धी सूचना हुन्छन् ।
यसैगरी जैविक विवरणमा दश औलाको छाप, आँखाको रङ, अनुहारको फोटोलगायत विवरण पर्छन् । हरेक व्यक्तिलाई १० अङ्कको छुट्टाछुट्टै परिचय पत्र दिइन्छ ।
