पूर्वेली प्रेस
विराटनगर : तीन महिनाअघि एन्टोइन ग्रिजम्यान नियमित एट्लेटिको मड्रिडको बेन्चमा थिए । क्लबसँगको सम्झौता पनि यसको एक कारक थियो । तर, अहिले लगातार दोस्रो विश्वकपको उपाधि लक्ष्यमा रहेको फ्रान्सबाट उनी उत्कृष्ट लयमा देखिएका छन् । यद्यपि, टिममा उनको भूमिका भने परिवर्तन भएको छ ।
फ्रान्सका लागि केलियन एमबाप्पे र ओलिभर गिराउडको गोल गर्ने भूमिकामा छन् । तर, शनिबारको क्वार्टरफाइनलमा इङ्गल्याण्डसँग खेल्नुअघि प्रशिक्षक ग्यारेथ साउथगेटले ग्रिजम्यान ‘असाधारण खेलाडी’ भएको बताएका थिए ।
एट्लेटिको मड्रिडका खेलाडी अहिले डिडियर डेसच्याम्पको फ्रान्समा मिडफिल्डरको रूपमा उदाएका छन् । जसले इङ्ल्यान्डविरुद्ध २–१ को जित निकाल्दा दुई असिस्ट गर्दै साउथगेटको भनाइलाई प्रमाणित गरे ।
३१ वर्षीय ग्रिजम्यान २०१८ को विश्वकपमा तेस्रो उत्कृष्ट खेलाडी घोषित भएका थिए । यसपटक भने उनी अझ माथि बढ्न सक्ने अनुमान गरिएको छ ।
ग्रिजमन र उनको टिम फ्रान्सले अब उपाधिका लागि लियोनल मेसीको अर्जेन्टिनासँग आइतबार फाइनल खेल खेल्दै छ । यदि फाइनलमा अर्जेन्टिनालाई पराजित गरे फ्रान्स सन् १९६२ पछि विश्वकपको लगातार दुई विश्वकपको उपाधि जित्ने पहिलो टिम बन्नेछ । १९६२ मा ब्राजिलले लगातार दुई उपाधि जितेयता कुनै पनि टिमले लगातार उपलब्धि हासिल गर्न सकेका छैनन् ।
के छ नयाँ ?
अधिकांश खेल करियरमा स्ट्राइकरको भूमिकामा रहेने ग्रिजम्यान १० नम्बरको जर्सी लगाएर पछाडि खेलिरहेका छन् । कारण थियो – पहिलो रोजाइका जोडी पाउल पोग्बा र एनगोलो कान्टे घाइते छन् । उनीहरु घाइते भएका कारण ग्रिजम्यानले कतार विश्वकपमा सेन्ट्रल मिडफिल्डबाट खेलिरहेका छन् । उनको त्यो पोजिसन उत्साहजनक सफल भइरहेको छ ।
फ्रान्सका प्रशिक्षक बोस डेसच्याम्प्सले आफूले ग्रिजम्यानलाई फरक भूमिकामा रहन आग्रह गरेको बताए । १९९८ मा विश्वकप जिताउन बोस डेसच्याम्प्स मिडफिल्डरको भूमिकामा थिए । ‘यसमा ग्रिजमनले आफ्नो पोजिसन नपाएकोमा दुखेसो गरेका छैनन् । उनी उदार छन् र बल पाउँदा र पास दिँदा आनन्द महसुस गर्छन् । पक्कैपनि उनले पहिलेको तुलनामा कम गोल गर्छन् । तर, उनी ट्यालक गर्न र बल खोज्न निकै रमाउँछन् । खेललाई बुझेर खेल्नका चाहिने सबैकुरा छ उनीसँग, भिजन, कार्यशैली, टच, त्यो इनर्जी र चलाखपन’, प्रशिक्षक बोस डेसच्याम्प्सले थपे ।
ग्रिजम्यानले पोर्चुगलका ब्रुनो फर्नान्डेज, इङ्ल्यान्डका ह्यारी केन र अर्जेन्टिनाका लियोलन मेसीसँग बराबर तीन असिस्ट गरेका छन् ।
बार्सिलोना तथा रियाल सोसिडाडका पूर्व फरवार्ड ग्रिजमन भन्छन्, “नयाँ भूमिकामा म केही स्वतन्त्र छु । खेलमा म रक्षापंक्ति र फरवार्ड लाइनबीचको जोड हुनैपर्छ । मसँग अगाडि तीन खेलाडी (एमबाप्पे, जिरुड र ओस्मान डेम्बेले) हुन्छन् । म अगाडि धेरै विकल्प भएकाले पनि मलाई केही सहज भएको छ ।”
“राष्ट्रिय टिमका सबै कुराहरूमा म डेसच्याम्पसप्रति ऋणी छु । फ्रान्सका लागि मैले सतप्रतिसत दिएको छु । यो जर्सीका लागि र मेरो आफ्नै लागि पनि । डेसच्याम्पसको भरोसा कायम राख्न मैले आफ्नो तर्फबाट उत्कृष्ट प्रयास गरिरहेको छु । सबै खेलमा म उनका लागि मेरो तर्फबाट धन्यवाद दिन्छु । म उनलाई मबाट गर्विलो महसुस गर्ने बनाउन चाहन्छु ।”
फ्रान्सेली टिममा ग्रिजमनसँगै युभेन्ट्सका अद्रियन र्याबियोट र रियाल मड्रिडका चुआमेनी मिडफिल्डरको रूपमा छन् ।
जारी विश्वकपका हालसम्म ग्रिजमनले एक गोल पनि गरेका छैनन् । अझ उनले अहिलेसम्म गोलका लागि ६ प्रहार गरेका छन् । जुन पछिल्लो संस्करणको तुलनामा १६ प्रहार कम हो । रुस विश्वकपमा उनले २२ प्रहार गरेका थिए ।
फ्रेन्च फुटबल पत्रका युलियन लोउरेन्स भन्छन्, “ग्रिजमनको भूमिका परिवर्तन गरेर मिडफिल्डमा बलका लागि दौडिनु बनाउनु डेसच्याम्पसको राम्रो कदम हो । यो विश्वकपमा सबैभन्दा धेरै मौका सृजना गरेका उनी उत्कृष्ट लयमा छन् ।”
ग्रिजमनले २०१४ को विश्वकपमा पाँच खेल खेल्दा सात प्रहार र सात मौका सृजना गरेका थिए । जहाँ उनले गोल र असिस्ट गर्न भने सकेका थिएनन् । एजेन्सीहरुको सहयोगमा
