पूर्वेली प्रेस
काठमाडौं । गृहमन्त्री रमेश लेखकको राजीनामा माग गर्दै आएको विपक्षी दलहरूको अवरोधका कारण संघीय संसदको प्रतिनिधिसभा बैठक भोलि बिहान ११ बजेसम्मका लागि स्थगित गरिएको छ।
आजको बैठक सुरू भएलगत्तै विपक्षी सांसदहरू संसदको रोस्ट्रम घेरेर नाराबाजीमा उत्रिएपछि सभामुख देवराज घिमिरेले प्रारम्भमा ३० मिनेटका लागि बैठक स्थगन गरेका थिए। तर, त्यसपछि संसद सचिवालयले सूचना टाँस गर्दै बैठक भोलिसम्मका लागि सारिएको जानकारी गराएको हो।
विपक्षीले भिजिट भिसा प्रकरणमा गृहमन्त्री लेखकको राजीनामा माग्दै आएको छ। उनीहरूले उच्चस्तरीय छानबिन आयोग गठन नभएसम्म र गृहमन्त्रीको राजीनामा नभएसम्म संसद चल्न नदिने चेतावनी दिएका छन्।
आजको बैठकअघि सभामुख घिमिरेले प्रमुख दलका सचेतकहरूसँग छलफलमार्फत समाधान खोज्ने प्रयास गरे पनि सहमति जुट्न सकेन। दुवै पक्ष आफ्नो अडानमा अडिग रहेका छन्।
यता, सरकार भने बिहीबार जेठ १५ गतेको बजेट प्रस्तुतिको तयारीमा जुटेको छ। बैठक अवरुद्ध भइरहेकाले सरकारमाथि राजनीतिक दबाब बढ्दै गएको देखिन्छ।
संसद अवरुद्ध भइरहँदा देशको आर्थिक र राजनीतिक कार्यसूची प्रभावित हुने सम्भावना देखिँदै गएको छ।
