पूर्वेली प्रेस
ताप्लेजुङको मिक्वाखोला गाउँपालिका–५ पापुङमा पर्छ लोदेन क्षेत्र । यहाँ विभिन्न जातीय संस्कार, संस्कृति र परम्परालाई बुझ्दै र अनुभव गर्दै पुग्न सकिन्छ । पापुङको प्रवेशद्वारका रुपमा रहेको साँवास्थित फुङफुङे झरनाको अवलोकन गर्दैै पैदल यात्रा गरी पुगिने लोदेनमा दर्जनौँ पोखरीले छुट्टै आनन्द दिलाउँछ ।
लोदेन पुग्न सदरमुकाम फुङलिङबाट दुई दिन जति लाग्छ । लोदेन क्षेत्रमा करिब ९५ भन्दा बढी पोखरीहरु छन् । यसलाई पोखरीहरुको राजधानी भन्दा पनि फरक नपर्ला । जैविक विविधता, हिमाल, पहाड, झरना, फाँट, सिरसिर चल्ने शितल पवन, राइनी र बुकीसहित रंगीन फूल, बास्ना सबैको संगम हो लोदेन । धार्मिक तथा पर्यटकीय दुवै हिसाबले सम्भावना बोकेको पापुङस्थित तोक्पेगोला र लोदेन क्षेत्र प्रचारप्रसारको कमीले ओझेलमा छ ।
यस क्षेत्रमा बसोबास गर्न मानिसहरुको मुख्य पेशा भनेको पशुपालन हो । यहाँका बासिन्दाले गाई, याक तथा चौरी पालेर जीवनयापन चलाउँछन् ।
जिल्लाको सदरमुकामबाट लोदनसम्म पुग्नका लागि पैदल यात्रा गर्नुपर्छ । सदरमुकाम फुङ्लिङबाट फुङफुङे झरनासम्म भने सवारीसाधन नियमित चल्छन् । शेर्पा समुदायको बाक्लो बसोबास रहेको लोदेनमा शेर्पा समुदायको संस्कार र संस्कृतिलाई नजिकबाट अनुभव गर्न पाइन्छ ।
सिम्बुकदेखि धेरैजसो खोला किनारै किनार भएर झन्डै १० घण्टाको यात्रामा लोदेन खर्क पुगिन्छ । टेलिफोन, इन्टरनेटको पहुँचभन्दा बाहिरको यस क्षेत्रको यात्रा जो कसैका लागि अविस्मरणीय हुन्छ । कतै अग्ला पहाडका चुचुरा, कतै तराईका झँै लाग्ने फाँट, छङछङ गर्दै बग्ने खोला, खोल्सा, हिमाली चराचुरुङ्गीको गुञ्जन, वारिपारि देखिने सानाठूला झरना, सयौँ प्रजातिका वनस्पति र फूलले ढाकिएको प्रकृतिको सुन्दरता भित्र रमाउँदै यात्रा गर्दा प्रकृतिप्रेमीका लागि स्वर्गकै आभाष हुने गर्छ ।
समुन्द्री सतहदेखि करिब चार हजार मिटरको उचाइमा पर्ने लोदेन क्षेत्रमा पोखरीले भरीभराउ छन् । लोदेनसहित पापुङमै पर्ने तोक्पेगोला सहितका क्षेत्र पर्यटकलाई आकर्षित गर्ने पर्यटकीय क्षेत्रका रुपमा देखिए पनि प्रचारप्रसार र भौतिक संरचनाको अभावले गुमनाम जस्तै बनेको पर्यटन प्रवद्र्धनमा सहयोग गर्दै आएका हेमराज निरौलाले बताउँछन् । निरौला लोदेन सहितका जिल्लाका पर्यटकीय क्षेत्रको प्रचारप्रसारमा केही वर्ष यतादेखि निरन्तर लाग्दै आएका छन् ।
तस्बीरहरु : हेमराज निरौला
