पूर्वेली प्रेस
काठमाडौं । काठमाडौं महानगरपालिकाका प्रमुख बालेन्द्र शाह आफैंले केही समयअघि गरेका निर्णयहरूबाट पछि हटेका छन्। सूचना प्रविधि, सुशासन, सम्पदा तथा पर्यटन र विधायन समितिका संयोजकहरू परिवर्तन गर्ने निर्णयविरुद्ध वडाध्यक्षहरूकै तीव्र असन्तोषपछि मेयर शाह पछि हटेका हुन्।
जेठ १ गते मेयर शाहले सूचना प्रविधि समिति संयोजक नवीन मानन्धर, सुशासन समिति संयोजक ख्यामराज तिवारी, सम्पदा तथा पर्यटन समिति संयोजक आशामान संगत र विधायन समिति संयोजक मचाराजा महर्जनलाई जिम्मेवारीबाट हटाएका थिए। उनीहरूको स्थानमा नयाँ संयोजकहरू नियुक्त गर्दै उनले नगर कार्यपालिका नियमावली २०७४ को नियम १५ अनुसार निर्णय गरिएको उल्लेख गरेका थिए।
तर, उक्त निर्णयप्रति वडाध्यक्षहरूबीच चर्को असन्तोष देखिएको थियो। धेरै वडाध्यक्षहरूले निर्णयलाई ‘एकपक्षीय’ र ‘बचकाना शैलीको’ भन्दै आलोचना गरेका थिए। एक वडाध्यक्षका अनुसार, “पछिल्लो समय आफैंले गरेका केही निर्णयहरूबाट मेयर शाह पछि हटेका छन्।”
शाहको निर्णय अनुसार सूचना प्रविधि समिति संयोजकमा एमालेका वडाध्यक्ष वीरेन्द्र प्रजापति, सुशासनमा कांग्रेसका दलबहादुर कार्की, सम्पदा तथा पर्यटनमा कांग्रेसकै विनोदकुमार राजभण्डारी र विधायन समितिमा रास्वपाकी रोजिना श्रेष्ठलाई तोकिएको थियो।
यद्यपि वडाध्यक्षहरूबीच यसबारे पर्याप्त छलफल नगरी निर्णय गरिएको भन्दै तीव्र असन्तुष्टि देखिएको थियो। पछिल्लो समय आफूले गरेका निर्णयहरू पुनर्विचार गर्दै मेयर शाह पछि हटेका हुन्।
यस घटनाले महानगरभित्र सहकार्य र समन्वय अभाव झल्किने विश्लेषकहरू बताउँछन्।
