पूर्वेली प्रेस
काठमाडौं । भारत र पाकिस्तानबीच लामो समयपछि युद्धविरामको सहमति भएको छ । दुवै देशका उच्च अधिकारीहरूले सार्वजनिक गरेका विवरणअनुसार यो सहमति तत्काल लागू हुनेछ, र स्थल, आकाश तथा समुद्र क्षेत्रमा सबै प्रकारका सैन्य गतिविधि स्थगित हुनेछन्।
पाकिस्तानका उपप्रधानमन्त्री तथा विदेश मन्त्री इशाक डारले एक टेलिभिजन अन्तर्वार्तामा भारतसँग पूर्ण युद्धविरामको सम्झौता भएको जानकारी दिएका छन्। उनले पाकिस्तानको तर्फबाट अब कुनै आंशिक होइन, पूर्ण रुपमा सैन्य गतिविधि रोक्न सहमति भएको बताएका छन्। भारतका विदेश सचिव विक्रम मिस्रीले पनि यसबारे पुष्टि गर्दै शुक्रबार दिउँसो भारतीय समयअनुसार १७ः०० बजेदेखि युद्धविराम लागू हुने बताएका छन्।
भारतका अनुसार पाकिस्तानका सैन्य अपरेशन्स महानिर्देशक (डीएमजीओ) ले आज भारतीय समकक्षीसँग फोनवार्ता गरी युद्धविरामको प्रस्ताव राखेका थिए, जुन भारतले स्वीकार गरेको हो। मिस्रीले जारी गरेको विज्ञप्तिमा भनिएको छ, “आज साँझदेखि स्थल, आकाश र समुद्र तीनै माध्यममा सबै प्रकारका सैन्य गतिविधि तत्काल रोक्ने सहमति भएको छ।”
दुवै देशका डीएमजीओहरूलाई उक्त सहमति पूर्णरूपमा कार्यान्वयन गर्न आवश्यक निर्देशन दिइएको छ। साथै, आगामी मे १२ मा दिउँसो १२ बजे दुवै देशका उच्च सैन्य अधिकारीबीच पुनः संवाद हुने बताइएको छ।
पाकिस्तानका उपप्रधानमन्त्री डारले युद्धविरामको सहमतिसँगै भारत–पाकिस्तानबीचको सैन्य संवाद तथा हटलाइन प्रणाली पनि सक्रिय बनाइएको बताएका छन्। “यो सहमति दुई देशबीच शान्तिपूर्ण सम्बन्ध विस्तारतर्फको सकारात्मक संकेत हो,” डारले जियो टिभीसँगको अन्तर्वार्तामा भने।
भारत र पाकिस्तानबीच दशकमै पटक–पटक युद्ध र सिमाना विवाद हुँदै आएको छ। पछिल्लो केही वर्षयता कश्मीर सीमामा झडप र गोलीबारीका घटनाहरू पुनः बढ्दै गएका थिए। यस पृष्ठभूमिमा भएको पूर्ण युद्धविरामको सहमतिलाई अन्तर्राष्ट्रिय समुदायले पनि सकारात्मक रूपमा हेरिरहेको छ।
विश्लेषकहरूका अनुसार यो सहमति दीर्घकालीन शान्तिको दिशामा एक महत्त्वपूर्ण कदम हुन सक्छ, यदि दुवै पक्षले यसलाई इमान्दारीपूर्वक कार्यान्वयन गरेमा।
भारत–पाकिस्तानबीच सन् २००३ मा पनि युद्धविरामको सहमति भएको थियो, तर त्यसपछि विभिन्न समयमा तनाव बढ्दै जाँदा त्यो कार्यान्वयनमा प्रभावकारी हुन सकेको थिएन। अहिलेको सहमति भने अधिक औपचारिक र स्पष्ट कार्यान्वयनको योजनासहित गरिएको बताइएको छ।
