पूर्वेली प्रेस
चितवन । पूर्व–पश्चिम राजमार्ग अन्तर्गत चितवनको पुल्चोक–गोन्द्राङ खण्डमा निर्माण सम्पन्न ६ लेन सडक आज औपचारिक रूपमा प्रधानमन्त्री केपी शर्मा ओलीले उद्घाटन गरेका छन्। नेपाल सरकारको आफ्नै लगानीमा निर्मित यो सडक एसियाली मापदण्डअनुसार निर्माण गरिएको हो।
उद्घाटन समारोहमा प्रधानमन्त्री ओलीले विकासको मुद्दामा राजनीति भन्दा माथि उठ्नुपर्नेमा जोड दिए। “अहिले चुनाव लागेको छैन, प्रचार गर्नुपर्ने बेला पनि होइन,” उनले भने, “हामीले सधैं राजनीति मात्रै गरेर हुँदैन। अब देश बनाउने काममा सबै जुट्नुपर्छ।”
उनले विकासका कामलाई साझा एजेन्डा बनाउँदै अगाडि बढ्न सबै दल र नेताहरुलाई आग्रह गरे। “विचारमा फरक हुन सक्छ, तर देश बनाउन सबैको एउटै मन हुनु जरुरी छ,” प्रधानमन्त्री ओलीको भनाइ थियो।
ओलीले चितवनको ऐतिहासिक महत्त्वसमेत स्मरण गरे। “त्रेतायुगदेखि नै चितवन राम जन्मेको पवित्र भूमि हो। यो एउटा सभ्यताको सुरुआत भएको क्षेत्र हो,” उनले भने।
उक्त सडक खण्डको शिलान्यास प्रधानमन्त्री ओलीले नै २०७७ माघ १७ गते गरेका थिए। कुल लागत १ अर्ब १३ करोड ३५ लाख रुपैयाँ परेको यो परियोजना भैरहवा, वीरगन्ज, पोखरा र काठमाडौं जोड्ने मध्य भेगमा पर्छ। आधुनिक प्रविधिबाट बनेको यस सडकले पूर्व–पश्चिम यातायातलाई थप सहज र सुरक्षित बनाउने विश्वास लिइएको छ।
