पूर्वेली प्रेस
विराटनगर । कोशी प्रदेश सार्वजनिक लेखा समितिले बेरुजुसम्बन्धि विवरण १५ दिन भित्र बुझाउन सरकारलाइ निर्देशन दिएको छ ।
समितिले १५ दिन भित्र जवाफ दिन मन्त्रालय र निकायलाई निर्देशन दिएको हो । आज बसेको समितिको बैठकले फर्छाैट हुनु पर्ने विषय, नियमिति हुनु पर्ने विषयसहित विवरण बुझाउन निर्देशन दिएको छ । समिति सदस्यहरुले प्रदेश सरकारको बेरुजु घटाउने गरी अघि बढ्नु पर्ने धारणा राखे ।
उनीहरुले बेरुजु बढ्दै गएको चिन्ता व्यक्त गरेका छन् । समितिको बैठकमा बोल्दै समिति सदस्य किशोरचन्द्र दुलालले बेरुजु वृद्धि भएको प्रतिवेदन आएको बताए । उनले बेरुजुलाई सकेसम्म अन्त्य गर्ने क्रममा रहेको हुँदा यसमा ध्यान दिन आवश्यक रहेको बताउनुभयो ।
मन्त्रालय र सम्बन्धित निकायले १५ दिन भित्र विवरण बुझाएपछि महालेखा परीक्षकसँग फेरी छलफल गर्ने निर्णय भएको समितिका सभापति राजन किराँतीले बताए ।
