पूर्वेली प्रेस
विराटनगर : कोशी प्रदेशको मुख्यमन्त्रीमा सत्ता गठबन्धनका तर्फबाट नेकपा माओवादी केन्द्र संसदीय दलका नेता इन्द्रबहादुर आङ्बो र कांग्रेसका विद्रोही पक्षधर केदार कार्कीले दाबी पेस गरेका छन् ।
दुवै जनाले बिहीबार प्रदेश प्रमुखसमक्ष ४७ सांसदको हस्ताक्षरसहित मुख्यमन्त्रीमा दाबी पेस गरेका हुन् । आङ्बोले दलका नेताहरुको हस्ताक्षर गराएका छन् भने कार्कीले ४७ सांसदको हस्ताक्षर लिएर दाबी पेस गरेका हुन् ।
केन्द्रीय गठबन्धनले कोशीमा माओवादीलाई मुख्यमन्त्री दिने निर्णय गरेपछि असन्तुष्ट बनेका डा. शेकर कोइराला निकट कार्कीले एमालेको सहयोगमा दाबी पेस गरेका हुन् । कार्कीलाई कांग्रेसका ८ जना प्रदेशसभा सदस्यले पनि दिएका छन् ।
कोशी प्रदेशका मुख्यमन्त्री हिक्मतकुमार कार्कीले विश्वासको मत पाउन नसकेपछि शनिबार पदबाट राजीनामा दिएका थिए । त्यसपछि प्रदेश प्रमुख परशुराम खापुङले शुक्रबारसम्म नयाँ सरकार गठनका लागि समय दिएका थिए । तर, त्यसको एकदिन अघि नै दुई जनाले दाबी पेस गरेका हुन्।
प्रदेश प्रमुखको कार्यालयले मुख्यमन्त्रीका रूपमा कसलाई मान्यता दिन्छ भन्ने यकिन छैन ।
