पूर्वेली प्रेस
विराटनगर : नेकपा एमाले कोशी प्रदेश कमिटीको उपाध्यक्षमा टीकाराम चेम्जोङ निर्विरोध निर्वाचित भएका छन् ।
प्रदेश राजधानी विराटनगरमा शुक्रबारदेखि जारी नेकपा एमाले कोशी प्रदेशको पहिलो अधिवेशनमा प्रदेश कमिटी उपाध्यक्षका लागि उनको मात्र उम्मेदवारी परेसँगै उनी निर्विरोध निर्वाचित भएका हुन् । नी निर्विरोध निर्वाचित भएपनि निर्वाचन समितिले घोषणा गर्न बाँकी छ ।
उनी यसअघि पनि प्रदेश कमिटीको उपाध्यक्ष थिए ।
चेम्जोङ २०७० सालको दोस्रो संविधानसभा निर्वाचनमा निर्वाचित सांसद हुन् । धनकुटाको चौबिसे निवासी चेम्जोङ कोशीमा एमालेको बलियो पकड भएका नेता हुन् । २०५४ सालपछि देशभर माधव नेपाल समूहको दबदबा भइरहँदा पनि धनकुटामा उनकै नेतृत्वमा ओली समूहले जिल्लाको नेतृत्व गरेको थियो ।
उनी २०४९ सालमा जिल्ला विकास समितिको उपसभापति, २०५४ सालमा जिल्ला विकास समिति सभापति निर्वाचित भएका थिए।
२०५४ सालमा पार्टी उपसचिव र २०५७ सालमा सचिवमा निर्वाचित भई २०६६ सम्म एमाले धनकुटाको नेतृत्व गरिसकेका नेता हुन् । यसअघि उनले अध्यक्षमा दाबी गर्दै आएका थिए ।
अन्य पदका लागि आजै मतदान गर्ने निर्वाचन समितिको तयारी छ ।
