पूर्वेली प्रेस
विराटनगर : नेकपा एमालेको नेतृत्वमा रहेको कोशी प्रदेशमा नेपाली कांग्रेसले आफ्नो सरकार बनाउन पहल गर्ने भएको छ ।
केन्द्रीय सत्ता गठबन्धन अनुसार प्रदेश सरकार गठन हुनुपर्ने माग राख्दै आएको कांग्रेसले माओवादी र जसपाले सरकारलाई दिएको समर्थन फिर्ता लिएपछि आफ्नो नेतृत्वको सरकार बनाउन पहल गर्ने भएको हो ।
मंगलबार बसेको कांग्रेस संसदीय दलको बैठकले सरकार गठनको पहल गर्ने निर्णय गरेको प्रदेश सांसद हिमाल कार्कीले बताए ।
माओवादी र जसपाले समर्थन फिर्ता लिएसँगै हिक्मतकुमार कार्की नेतृत्वको सरकार अल्पमतमा परेको छ ।
एमाले संसदीय दलका नेता कार्की २५ पुसमा संविधानको धारा १६८ को उपधारा (२) बमोजिम दुई वा दुईभन्दा बढी दलहरूको समर्थनमा मुख्यमन्त्री नियुक्त भएका थिए । उनलाई एमालेका ४०, माओवादीका १३, राप्रपाका ६ र जसपाकी एक सांसद गरि ६० जनाको समर्थन थियो ।
६० सांसदको समर्थनमा मुख्यमन्त्री बनेका कार्कीलाई अब एमाले र राप्रपाको मात्रै समर्थन बाँकी छ ।
